بعد الطوفان

 * من التشك ابس اللطيفة و المهمة اللي ابتديت أطبقها مؤخرا ( أفنيت عمري في في الوصول لبديهيات و الله ) إن كلما راودتني نفسي إني أقوم بأي فعل و كلما غلبت الحماسة الحسابات , بسأل نفسي : طب يا إبني إنت بتعمل ده عشان السبب الظاهري فعلا ولا عشان الإيجو ناقح عليك ؟؟ , إن كان الإيجو فليذهب للجحيم (أنيس عبيد) و هات شوية لب و إتسلى , أو بمعني آخر إن كانت بغرض الصورة سيبها و تعالى علي نفسك و عذبها ..

 

* في المقابل كلما لقيت إني متردد قصاد فعل ما , بدور على السبب , في حال طلع الخوف من إني قد لا أكون قدر الفعل أو ما إصطلح عليه العلماء بالخزي , بأتجه لتكنيك عكس الشعور و أعافر بثقة في مكان قد أكون أقل واحد فيه علما , أنا قابل للخطأ و للعيوب لكن على الطريق و هذا يكفي ..

 

  *غالبا و بشكل مستمر , لما بلعب لعبة المنقذ باخد الزحليقة و ألعب في نفس الفيلم ( أو أفلام تالية في نفس البروجرام) لعبة الجاني و لعبة الضحية  

 

* مفيش خوازيق بتيجي من حذر زايد عموما في الغالب بتيجي من  حماسة زايدة ( مساكين أهل الإمبالسيفيتي حتي قبورهم عليها تراب الذل )

 

* صديقة بتحكيلي إنها كانت بتقفل الباب بإصرار أمام محاولات أحدهم للرجوع لحياتها ..إلي أن جاءت لحظة هي في قاع المنحنى النفسي ف هي اللي بادرت بالكلام ..

قالت لي في وصف الموقف ما معناه " في هذة اللحظة هو حس ان طاقة القدر اتفتحله " ..بعد لحظة استدركت: " او أبواب جهنم " ..

تقريبا ده أجمل و ادق تعبير عربي سمعته بيوازي معني جملة برنارد شو :

  There are two tragedies in life. One is to lose your heart's desire. The other is to gain it.

 

* نفس الصديقة لها نظرية بتقول

" at some point they all come back , matter of time which will be shorter the more severe the breakup was "

قد ازيدها من الشعر بيت و اقول

"Those who choose to end for reasons that lack logic will come back for endings that makes more sense.. "

( بإستثناء حالات عدم التكافؤ الوجداني التي لا يصرح بها أحد عادة.. و لتوضيح المصطلح هستخدم جملة طلال فيصل : "التكافؤ الوجداني يا عزيزي هو أنه في كل حكاية ثمّة واحد يحترق حبًا، وواحد يهز كتفه بلا مبالاة قائلًا أنا آسف! والنار بقت دخان ورماد ...")

 

* الحياة مربكة و عجيبة جدا إن كل ما تدعيه في نفسك بتختبرك فيه , و لو سقطت فالأيام بتدور و بيرجع نفس الإمتحان لحد ما المعلومة توصل ف العقبة بتختفي أو تتحول لطاقة شحن كلما تسلل الزهق أو التعود..

 

*  في لحظات الدوشة دور عالأساسيات , لو مش موجودة هد كله و إبني صح

* العمر بشكل ما هو فعل زراعة , أنت ما تبنيه بشكل منتظم و تصبر على عتبات ملله و تعبه و تضحي لأجله ببعض الإختيارات الآخري..

 

 * أعظم النعم هي الشوف , الشوف , الشوف..

* أعتقد إن من أهم ملكات الحياة هي القدرة علي المرور عبر الألم ..بصيغة أخري القدرة علي إتخاذ القرارات بعيدا عن حسابات اللذة و الألم ، إن البني آدم يقدر يتعايش بشكل ما و فيه ألم خفيف في هامش حياته ( و هنا بتكلم عن الحياة الmiserable مش الhorrible علي حسب تقسيمة وودي الان )..

الملكة دي بدورها بتختلف من شخص للتاني زي ما إمتحان كل شخص مختلف عن إمتحان اخوه البني آدم التاني، لكن اعتقد فيه ٣ ساحات كلما ترقي الإنسان فيهم الأمور بتبقي اكتر سلاسة

١ ) التعرض المستمر لجرعات من عدم الراحة ، علي العكس البني آدم اللي في حماية دايمة لذاته من اي حرمان / تعب / عدم راحة / ألم ضروري هو في النهاية بيعرض نفسه لتسونامي من الاضطرابات الداخلية لما يعترض طريقه اي منغص ( و هو هيحصل هيحصل لان الحياة في النهاية مش جنينة )

٢) نمط الحياة المتغير...بشكل ما اللي سيناريو حياته ثابت من ناس و أماكن و فلك ثابت بيدور فيه بيصعب عليه جدا تغير اي شيء في سكريبت حياته اللي راسمه لنفسه و ماشي عليه كخط ثابت طول عمره ، و بيبقي في غاية التشبث باي شيء او شخص يخرج عن هذا الدور المنتظر..

٣) connection.vs disconnection to life

الإنسان أعمي حين يتعلق الامر بمطاردة أحلامه، بالعكس قد يعيقه سعيه لمطاردة الغزال عن رؤية الغابة ..لما الإنسان بيتصل بالحياة و الناس و لا تحوشه اغراض الحياة عن النظر بيبصر اشياء كتير تحدث له دون ان ينتبه ، و أصوات كتير تاهت في الزحمة ، احيانا الزحمة و الدوشة في حد ذاتها فقدان اتصال ..الي ان يخرج من الترس و يشعر بما يجري من حوله و يخرج من الغرف المغلقة و علب التونة فهو أسير أفكاره..هذا الاتصال بالدنيا و بالذات و بالناس و بالله هو المنجي و هو إكسير الحياة ..

طيب هل لو مشي علي كل ده هو معافي من اي ألم ؟ في النهاية فيه ألم ضروري في وصفة الدنيا ..لأغراض كتير منها إجباره علي تغيير جذري في شخصيته منها قربه اكتر من نفسه و من ربنا منها تخن الجلد الخ..لكن بالقدر المطلوب ، لا يستسيغ فكرة انه ضحية و انه واقع في حفرة ولا يهرب من اي بادرة ألم و يتجه للحل الأسلم..الميزان ..الميزان كما كل شيء في هذة الدنيا و الطريق التالت اللي في الأغلب بيبقي هو الطريق الاقرب للصواب في رايي